港府一錯再錯 經濟學者「算賬」 每年電費加硬 10% 2012年02月07日

港府一錯再錯　經濟學者「算賬」
每年電費加硬 10%

2012年02月07日


【本報訊】立法會將於今日討論兩電追加的資料，以決定是否須進一步行使《權力及特權法》，迫使兩電進一步披露加電費的理據及透明度。


與利潤管制法則「鬥爭」逾 30年的經濟學者林本利坦言，現在「搞乜都無用」，大家最好「使少啲」，因為出年起電費，每年最少要加 10%。　


記者：陳健文

林本利籲大家「使少啲」，因為出年起電費最少加 10％。　梁志永攝



曾任理工大學會計及金融系副教授的林本利接受本報訪問時說：「政府喺 08年嗰陣錯過咗開放市場嘅機會，又繼續俾兩電可以用增加固定資產投資嘅方法嚟增加回報，嗰時已經知道之後幾年香港電費一定會大升……唔改不特止，仲要加咗擱淺成本同埋仲裁機制兩項辣招落去，而家真係無彎轉。」

兩電開支已批冇得改

他估計，出年起電能實業（ 006）旗下港燈及中電（ 002）旗下中華電力，每年電費加幅一定超過一成，「由 2008年到 2013年嘅資本開支都批晒喇，一改就會俾兩電告，無得改……之後到 2018年嘅雖然未批，但政府要兩電加大使用天然氣，咁即係又要買機組啦，咪又係要繼續加。」

「大家若果諗住節約能源想慳啲電費仲死，因為電力使用減少，即係電費收入減少啦，兩電為咗要賺到規定嘅准許回報，加電費仲加得多左……所以而家真係做乜都無用！」林本利說。

里昂估計，單是中電於 2013及 2014年每年便須加電費 10%，以彌補高昂的天然氣成本，不過，鑑於今年加電費引起軒然大波，所以預料中電明年只可調高 6%電費。

該行對中電的盈利預測亦以加電費 6%為假設，預期中電今年整體盈利可重上 100億元。

中電及港燈發言人均向本報表示，加電費要取決很多不同因素，現階段未能對 2013至 14年電價水平作估算。 

里昂：中電盈利料破百億

港府官員口口聲聲表示不接受電費加幅，更「拍心口」說要幫市民對電費把關。林本利「睇死」港府今次都是「無料到」，「要做改革最緊要有決心，我真係睇唔到囉……解決呢個問題嘅答案係開放市場，而家到 2018年得嗰 6年，又要研究又要諮詢，好明顯唔夠時間，大家預咗繼續加電費啦！」

他又質疑，當年開放電訊市場及為巴士引入可加可減機制亦相當困難，但港府可以做到，不明白為何兩電協議運作多年後，也未能開放電力市場，「外國都可以做到，即係技術可行啦，港府同兩電提出嘅問題全部都係藉口！」

野村認為，雖然到 2018年前「大改」利潤管制法則的機會很小，但鑑於今次社會對加電費的反彈，在進行中期及長期檢討時，在群眾壓力下港府不會再像 08年時「咁順攤」，特別是回報計算及加電費問題。


不過該行相信，基於種種限制，香港電力市場不會出現戲劇性變化。


http://hk.apple.nextmedia.com/template/apple/art_main.php?iss_id=20120207&sec_id=15307&art_id=16047918&av_id=16048680

轉貼自蘋果日報     版權皆屬蘋果日報擁有