阿爺出招　地價倒水咁倒
中環在線：超人上海囤地中伏

2012年02月10日

前幾年內地嘅地價、樓價炒到㷫烚烚，可以話識上唔識落，結果吸引咗唔少本港大孖沙北上掃貨，當中「擅長」喺內地買地嘅長和系更加係其中表表者，主席李嘉誠（超人）仲賺到盆滿缽滿㖭，但結果就畀內地傳媒話佢囤地。

不過舊年阿爺開始出招打遏樓市，搞到內地嘅地價同樓價即時大冧，好多地皮價值都縮咗水，今次連超人都中晒招，即時嘗到苦果！

超人揸旗嘅和黃（ 013） 2010年底喺上海以每平方米 21436蚊人仔嘅樓面地價，將上海趙巷 17號「地王」收歸麾下，當時消息轟動整個市場！但超人勢估唔到阿爺之後會對樓市咁重手，頻頻出招推低樓價，搞到內地嘅地價、樓價係咁跌，攬住大量地皮嘅中港兩地發展商只能望住地皮淚漣漣。

買趙巷地王曾轟動市場

舊年年底，上海「地王」隔離幅地拍賣，即係趙巷 16號地皮，結果以底價 14.087億元人仔拍出，折合樓面地價只係每平方米 9559蚊人仔，同和黃一年前買「地王」個價相比，地皮價值喺短短一年就縮咗水 55%，簡直嚴重影響「地王」之後嘅盈利空間，相信超人經過今次事件之後，喺大陸投資應該都會謹慎啲。

超人呢兩年豪擲過百億人仔「北伐」，長和系喺內地嘅地皮「足迹」遍及大江南北，分佈廣州、深圳、珠海、東莞、佛山等地，截至舊年 6月，和黃 97%可發展成 980萬平方米住宅嘅土儲都喺大陸㗎。
李華華

http://hk.apple.nextmedia.com/template/apple/art_main.php?iss_id=20120210&sec_id=15307&art_id=16058222&av_id=16058723

轉貼自蘋果日報版權皆屬蘋果日報擁有