隔牆有耳：港產絲苗米　重出江湖

2012年04月05日

家陣香港地豺狼當道，隨時冇啖好食。新界有農莊早着先機，舊年開始大搞有機稻米種植班，等平時食米唔知米貴嘅香港人，可以喺亂世來臨前學一技傍身。農莊莊主仲特登引入絲苗米，希望令曾經風光一時嘅「本土名牌」元朗絲苗重現江湖。

少女假日農夫落力拔稻苗，準備插秧種米。
陳耀強攝

上水樂活農莊莊主黎明輝話，喺幾十年前，元朗大部份居民都係靠種米為生，飯香米靚嘅元朗絲苗，價錢貴過晒其他入口貨。不過香港宜家冇晒稻田，佢就諗到用有機農場平台搞導賞團，俾人學吓環保兼夾做假日農夫學種米。

唔會用便便做肥料

八方睇番資料，香港地最後一個米農，應該係 1988年仲有喺東涌耕田打魚嘅發叔一家。自始之後，就冇乜聽過有人喺香港種米。

呢幾日插好嘅秧苗，等到 8月就有收成。

捲土重來嘅有機稻米一年有兩造，立春之後開始播種培苗，六個星期後可以將稻苗放入稻田插秧。因為香港氣候關係，第一造會先種油粘米，大概 8月有收成；第二造再種絲苗，到 11月就有土產絲苗面世。

東涌嘅發叔，應該係香港最後一個米農，佢喺 1988年仲有種米。
撮自 YouTube畫面

農莊用嘅有機肥料，大家千祈唔好誤會係用佢哋嘅便便，其實肥料係用樹葉或者骨粉，加入自製環保酵素堆肥而成。黎明輝話︰「家陣都冇人倒夜香啦，邊有咁多便便做肥料。」佢話有機耕種有三不，唔用農藥、唔用化肥同唔用基因改造種子，總之夠晒天然就係正貨，真係粒粒皆辛苦o架！

http://hk.apple.nextmedia.com/template/apple/art_main.php?iss_id=20120405&sec_id=4104&art_id=16222439&av_id=16222606

轉貼自蘋果日報版權皆屬蘋果日報擁有