社區二手店 舊傢俬變寶 2012年04月20日

社區二手店　舊傢俬變寶

2012年04月20日

【記者胡仲邦報道】潮流興環保！仍新淨的過時衣飾及傢俬若棄掉，葬身堆填區太過浪費，送到社企變賣可成為低下階層的恩物。在長沙灣一工廈開設的「社區二手店」，積極向社會人士收集全新及二手物品，甚至上門接收大型傢俬，再以廉價轉售。環保之餘，也減輕基層市民的負擔，更有中產人士定期到二手店尋寶。

中產基層齊尋寶

社區二手店內放有林林種種貨品， 5元一件衫， 25元一雙斷碼鞋，價廉物美，當中有不少筍貨， 900元一個二手鋼琴、 450元一張按摩椅、 450元一張全新宜家雙人床褥，只要肯花時間，不難執到寶。該店於 02年由勞資關係協進會數名女工開辦， 05年在長沙灣租用約 6,000呎工廈單位後，開始接收傢俬電器，成為少數收大型家電物品的社企，地舖設於深水埗。

黎婉薇指社區二手店惠及基層市民。

市場及客戶總監黎婉薇指，該店貨源來自社會人士及廠家捐贈，客源主要為基層市民，「附近有幾個大屋苑住咗唔少中產，佢哋比較注重環保，除咗捐贈物品，仲會搵吓有冇好嘢」。回收貨品後，該店會整理及翻新再標價出售，「傢俬會用膠紙包好，電器就搵師傅檢查冇問題先賣」。黎指，香港的固體廢物處理並不完善，社區二手店做到資源再分配的效果。

店內連鋼琴都有擺放售賣。
黃賢創攝

地球之友環境事務經理朱漢強表示，香港裝修文化傾向消費主義，「爛咗少少搵唔到配件，或者唔識得點維修就丟，有時喺垃圾房見到仲好新淨嘅傢俬，好唔環保」，他認為回收二手傢俬有助減輕垃圾量及堆填區負擔。惟傢俬需要較大面積貯存，租金成本高，他盼政府向社企提供租金優惠。

http://hk.apple.nextmedia.com/template/apple/art_main.php?iss_id=20120420&sec_id=4104&art_id=16265901&av_id=16266205

轉貼自蘋果日報          版權皆屬蘋果日報擁有